Վենեսուելայի խորհրդարանի խոսնակ, ընդդիմության առաջնորդ Խուան Գուաիդոն հայտարարել է, որ երկրում իշխանափոխությունը շահավետ կլինի Ռուսաստանի և Չինաստանի համար: Այս մասին նա ասել է Reuters-ի հարցազրույցում:
«Վենեսուելայում կայունությունն ու ռեժիմի փոփոխությունն ամենից շատ պետք է ձեռնտու լինի Ռուսաստանին և Չինաստանին: Նախագահ Մադուրոն չի պաշտպանում երկրի շահերը, իսկ օտարերկրյա ներդրողների համար շահավետ չէ նման գործընկեր ունենալ»,- ասել է նա:
Բացի այդ, Գուաիդոն նշել է, որ արդեն փորձել է կարգավորել Մոսկվայի և Պեկինի հետ շփումները: Նա նաև խոստացել է հաղթանակի դեպքում սատարել պետական արժեթղթերի և պարտատերերի առջև նախկինում ստանձնած պարտավորությունները:
Ավելի վաղ Եվրոխորհրդարանը Գուաիդոյին Վենեսուելայի «ժամանակավոր լեգիտիմ նախագահ» էր ճանաչել: