Ուկրաինայի նախագահ Պյոտր Պորոշենկոն երկրում ռազմական դրություն սահմանելու անհրաժեշտությունը բացատրել է Ռուսաստանի հետ մեծամասշտաբ պատերազմական դրության սպառնալիքի առկայությամբ:
«Չեմ ցանկանում, որ որևէ մեկը մտածի, թե այդ ամենը խաղ է: Երկիրը գտնվում է Ռուսաստանի հետ մեծամասշտաբ պատերազմի վտանգի տակ»,- ասել է Պորոշենկոն ուկրաինական հեռուստաալիքների հետ զրույցում՝ նշելով, որ դա հաստատվում է ուկրաինական սահմանների մոտ ռուսական ռազմական ներկայության մեծացմամբ:
Ընդ որում, ըստ Известия պարբերականի տեղեկությունների՝ պաշտոնական Կիևն իր տարածքում ամերիկյան ռազմաբազա հիմնելու շուրջ բանակցություններ է սկսել: Պորոշենկոյի ղեկավարած կուսակցության անդամ Իվան Վիննիկի խոսքով՝ ամերիկյան ռազմական ներկայությունը կապահովի Ուկրաինայի անվտանգությունը:
Միևնույն ժամանակ, ռուսական կողմը պնդում է, որ Ռուսաստանը պատերազմը չի դիտարկում որպես Ուկրաինայի հետ հարաբերությունների հեռանկար:
Հիշեցնենք, որ երեկ Ուկրաինայում 30 օրով ռազմական դրություն հայտարարվեց՝ Կապված Կերչի նեղուցում տեղի ունեցած միջադեպի հետ: