ԱՄՆ նախագահ Դոնալդ Թրամփը հայտարարել է Արգենտինայում G20-ի գագաթնաժողովի շրջանակում ՌԴ նախագահ Վլադիմիր Պուտինի հետ հանդիպումը չեղարկելու հնարավորության մասին՝ կապված Կերչի նեղուցում տեղի ունեցած միջադեպի հետ:
Ինչպես փոխանցում է ТАСС-ը, Թրամփը նշել է, որ միջադեպի հետ կապված ազգային անվտանգության հարցերով իր թիմից «ամբողջական զեկույց» է ակնկալում:
«Զեկույցը որոշիչ նշանակություն կունենա: Հնարավոր է՝ չհանդիպեմ Պուտինի հետ: Ինձ դուր չի գալիս այդ ագրեսիան»,- The Washington Post-ին ասել է ԱՄՆ նախագահը:
Թրամփի խոսքով՝ Կերչի նեղուցում ստեղծված իրավիճակի մասին զեկույցը կստանա այսօր:
«Ինձ բացարձակ դուր չի գալիս այդ ագրեսիան: Եվ, ի դեպ, Եվրոպային ևս պետք է դուր չգա այդ ագրեսիան: Եվ Գերմանիային նույնպես»,- հավելել է նա՝ հերթական անգամ Գերմանիային կոչ անելով ավելացնել պաշտպանական ծախսերը:
Ավելի վաղ ԱՄՆ պետքարտուղարն Ուկրաինայի և Ռուսաստանի նախագահներին ուղիղ բանակցությունների կոչ էր արել: