Սահմանային լարվածության օրերին զոհված կրտսեր սերժանտ Վրեժ Սարգսյանը Գեղարքունիքի մարզի Փոքր Մասրիկ գյուղից էր: Ավելի վաղ
զրուցել էինք գյուղապետ Վարդան Մարգարյանի հետ, ով տեղեկացրել էր, որ Վրեժի ընտանիքն ապրում է ծայրահեղ ծանր պայմաններում, տան միակ աշխատողը Վրեժն էր:
Մամուլում այսօր լուրեր տարածվեցին, ըստ որի՝ Սարգսյանները 600 հազար դրամի վարկ են վերցրել «Արեգակ» վարկային կազմակերպությունից, և որ աշխատակցիներն օրերս եկել են ու զոհված զինծառայողի ընտանիքից մարում պահանջել:
MAMUL.am-ի թղթակցի հետ զրույցում գյուղապետ Վարդան Մարգարյանը պարզաբանեց` կազմակերպության աշխատակիցներն իրոք եկել են, բայց ոչ թե վարկն են պահանջել, այլ տեղեկատվություն հայտնել. «Վարկային կազմակերպության աշխատակիցներն ասացին, որ ցավում են տեղի ունեցածի կապացությամբ ու քանի որ իրենց պարտքն է վարկառուին հիշեցնելու, որ մարման օրն է, տնօրենն էլ հանրապետությունում չէ, ու դեռևս հրահանգ չկա վարկը չեղարկելու, պարզապես հիշեցնում են: Ավելին, աշխատակիցները հայտնեցին, որ փաստաթղթեր են պատրաստում, որ երբ տնօրենը վերադառնա, զբաղվեն չեղարկման հարցերով»,- ասաց գյուղապետը` հավելելով, որ իր հորդորով Սարգսյանները դեռևս վճարում չեն կատարի:
Գյուղապետը տեղեկացրեց, որ այս ընթացքում զոհված զինծառայողի ընտանիքն օգնություններ է ստացել ինչպես ՊՆ-ից, այնպես էլ մարզպետարանից, գյուղապետարանից, պատգամավորից: