Այսօր ուսանողների մասնակցությամբ երևանյան ցույցերին կրկին անդրադարձ են կատարել միջազգային մի շարք լրատվամիջոցներ:
ՀՀ պաշտոնաթող նախագահ, վարչապետի պաշտոնում առաջադրված Սերժ Սարգսյանի դեմ անցկացվող բողոքի ակցիաներին հատուկ ուշադրություն են արժանացրել ղազախստանյան լրատվամիջոցները: Նշենք, որ ռուսական լրատվամիջոցները երևանյան ակցիաները լուսաբանում են զգուշորեն, կցկտուր, որոշ լրատվամիջոցներ նույնիսկ զերծ են մնում որևէ մեկնաբանությունից:
Մասնավորապես, informburo.kz-ը գրում է.
«Հայերը չեն ցանկանում, որպեսզի Սերժ Սարգսյանը կրկին ղեկավարի երկիրը»: Կայքը նաև հայտնում է, որ Սերժ Սարգսյանի վարչապետության դեմ բողոքող ցուցարարները, որոնց միացել են նաև ուսանողներն, անկարգություններ են կազմակերպել և փակել Երևանի կենտրոնական փողոցները, ինչպես նաև հաղորդվում է, որ ցուցարարները մտադիր են 36 ժամվա ընթացքում փակել փողոցները, կամուրջները, շրջափակել խորհրդարանի շենքը:
«Рамблер»-ը՝ հղում անելով «Sputnik Азербайджан»-ին հայտնում է, որ «Երևանը ոտքի է կանգնել՝ ընդդեմ Սերժ Սարգսյանի»:
Ցույցերի մասին մակերեսորեն հայտնում են նաև ТАСС-ը, РИА Новости-ն, РБК-ն:
«Кавказский узел»-ը հաղորդում է, որ ընդդիմադիր Նիկոլ Փաշինյանն ավելի վաղ հայտնել էր Սերժ Սարգսյանի վարչապետության դեմ պայքարի առաջին փուլի հաջող ավարտի մասին:
Ամերիկյան լրատվամիջոցները ևս անդրադարձ են կատարում. մասնավորապես, ցույցերի մասին գրում են Us News-ը, The Washington Post-ը, Associated Press-ը:
Հանրահավաքներին անդրադառնում են նաև ուկրաինական, ադրբեջանական լրատվամիջոցները:
Երևանի փողոցների երթևեկությունը կաթվածահար անելու և Ս. Սարգսյանի դեմ բողոքի բազմահազարանոց ցույցերի մաին գրում է նաև Journal du Cameroun-ը:
Նշենք, որ ռուսական լրատվամիջոցները ցույցերը լուսաբանելիս հին կադրեր են ցուցադրում: Մասնավորապես, ТАСС գործակալությունը հրապարակել է 2016թ. ՊՊԾ գնդի գրավման ժամանակ արված լուսանկարը:
