Միջազգային

ՀՖՖ նախագահ Ռուբեն Հայրապետյանը խոսել է այս տարի «Տարվա լավագույն մարզիկ» անվանակարգի քվեարկությանը ՀՖՖ գործկոմի անդամների չմասնակցելու, ինչպես նաև «Տարվա լավագույն մարզիչ» անվանակարգ չսահմանելու մասին։

«Անընդհատ ինչ-որ շահարկումներ և խոսակցություններ են լինում, որ տարվա լավագույն մարզիկ, մարզիչ քվեարկություններն անարդար է լինում, այդ պատճառով որոշել ենք ֆեդերացիային հանել քվեարկությունից և լավագույնին կընտրեն լրագրողներն ու ակումբները։ Այս կերպ կփորձենք ֆեդերացիային ավելի շատ հեռու պահել նման թեմաներից: Տարվա լավագույն մարզիչ կոչումը երբեք էլ չի եղել։ Ես գտնում եմ, որ մենք ժամանակին ճիշտ չենք արել, որ մտցրել ենք այդ անվանակարգը: Հիմա որպեսզի ավելորդ խոսակցություններ չլինեն, թե ով պետք է քվեարկի, ով` ոչ, ով է լավը, ով՝ ոչ արդար է, թե՝ ոչ, հանել ենք այդ անվանակարգը։ Եթե հիշում եք, մենք ունեինք «Հայկական Մոուրինյո»: Նա անցած տարի հայտարարեց, որ ինքն է լավագույնը, բայց սխալ ընտրություն է կատարվել: Նման բաներից խուսափելու համար, ավելի լավ է չանցկացնենք քվեարկությունը: Հետագայում եթե անհրաժեշտություն լինի, կքննարկենք հանրության հետ և նորից կմտցնենք»,- նշել է Հայրապետյանը: