Իրադարձություններ

Ինչպես արդեն տեղեկացրել ենք, Եվրոպայի Խորհրդի Խորհրդարանական Վեհաժողովի (ԵԽԽՎ) երևանյան գրասենյակի առջև այսօր տեղի էր ունենալու բողոքի ակցիա: Ակցիայի կազմակերպիչներից Ծովինար Կոստանյանը լրագրողների հետ զրույցում տեղեկացրել է, որ ԵԽԽՎ-ի երևանյան գրասենյակին են հանձնել պահանջագիր և Ադրբեջանի նախագահ Իլհամ Ալիևի նկարով ԱՄՆ դոլարներ: «ԵԽԽՎ նախագահ Պեդրո Ագրամունտն անջատել էր հայկական պատվիրակության անդամների խոսափողները, երբ վերջիններս խոսում էին ԵԽԽՎ-ի կաշառված լինելու մասին: Որպես ՀՀ քաղաքացի, մենք մեր բողոքի ձայնն ենք բարձրացնում, որպեսզի Ագրամունտը չկարծի, որ հեշտորեն կարող է անջատել և զրկել հայերին խոսքի իրավունքից: Արգամունտի նման վարքագիծ ունեցող անձը չի կարող նման կառույցի ղեկավար լինել»,- ասել է ակտիվիստը: Վերջինը կարծում է, որ Արգամունտը վարում է ադրբեջանական քաղաքականություն. «Արգամունտը բազմիցս է լինում Բաքվում և այնտեղից պրոադրբեջանական հայտարարություններով հանդես գալիս: Այդ իսկ պատճառով էլ մենք ասում ենք, որ նա վաճառվել է Ադրբեջանին և դոլարանային դիվանագիտություն է վարում»,- ասաց Ծովինար Կոստանյանը: Նրա խոսքով իրենց ակցիան շարունակական է լինելու, առաժմ սպասելու են ԵԽԽՎ-ին հանձնվելիք պահանջագրի պատասխանին:
     Հիշեցնենք, որ ԵԽԽՎ նախագահն ազատ քննարկման ժամանակ անջատել էր հայկական պատվիրակության անդամներ ԱԺ ՀՀԿ խմբակցության պատգամավոր Նաիրա Կարապետյանի և ԱԺ ԲՀԿ խմբակցության ղեկավար Նաիրա Զոհրաբյանի խոսափողները, երբ վերջինները փաստում էին ԵԽԽՎ-ի կողմնակալությունը և կաշառված լինելը: