ԱԺ ՀԱԿ խմբակցության պատգամավոր Լյուդմիլա Սարգսյանը քիչ առաջ հարց ուղղեց ՀՀ նորանշանակ վարչապետ Կարեն Կարապետյանին` փորձելով պարզել` ինչպիսի քայլեր է ձեռնարկելու ՀՀԿ նիստում ներկայացրած ծրագրերը կյանքի կոչելու համար: Սարգսյանը նաև հետաքրքրվեց, թե ծրագրեր մշակելիս` պահպանելու է արդյոք նախկին կառավարության քաղաքականությունը: Եվ վերջինը` կադրերի ընտրության հարցում ինչպիսի մոտեցում է ցուցաբերելու:
ՀՀ վարչապետը պատասխանեց. «Այո, հայտարարել եմ, որ փուլային երկու ծրագիր ենք ներկայացնելու, բայց շտապեմ նշել, որ առաջին ծրագրով արագ փոփոխություններ չեն լինելու` նախանշվելու են քայլերը: Երկրորդի դեպքում` որոշելու ենք, թե որ ուղղությամբ ենք տանելու երկիրը: Սպասելիքներ, որ տնտեսությունն արագ կփոխենք, չի լինի, բայց ազդակներ կտանք, թե այն որ ուղղությամբ է զարգանելու: Մյուս Ձեր հարցին պատասխանելով` ասեմ, որ նախկին կառավարության ծրագիրն, այո, օգտագործելու ենք: Ինչ վերաբերում է կառավարության կազմին, ընդունելու ենք մաքսիմալ պրոֆեսիոնալների: Այսօր լավ կադրերի պակաս կա Նյու Յորքում, Լոնդոնում, Մոսկվայում և իհարկե` Երևանում: Կախարդական փայտիկ չկա. եթե տնտեսության մեջ փոփոխություն ենք ուզում, պետք է համակարգային փոփոխություն իրականացնենք: Ռեալ կասեմ` ՀՀ տնտեսության վիճակը չափազանց ծանր է»,- ասաց Կարապետյանը: