Թուրքիայի նախագահ Ռեջեփ Թայիփ Էրդողանն իր ուղերձում Ռուսաստանի նախագահ Վլադիմիր Պուտինին ցավակցություն է հայտնել` «Su-24»-ի օդաչուի մահվան կապակցությամբ, հայտնել է պետության ղեկավարի մամուլի խոսնակ Դմիտրի Պեսկովը:
«Թուրքիայի ղեկավարն իր ուղերձում երկրի նախագահին և հանգուցյալի հարազատներին ու մերձավորներին հայտնել է իր խորին ցավակցությունը` ռուս օդաչուի մահվան կապակցությամբ և ասել`«ներողություն», - ասել է Պեսկովը:
Ըստ նրա, թուրք առաջնորդը պատրաստակամություն է հայտնել անել հնարավոր ամեն ինչ` վերականգնելու համար վաղեմի բարեկամական հարաբերությունները երկու երկրների միջև:
Ուղերձում Էրդողանը հավաստիացրել է, որ Անկարան «երբեք չի ունեցել ցանկություն և մտադրություն` Ռուսաստանի Դաշնությանը պատկանող օդանավը կործանելու համար: Նա նշել է, որ պատրաստ է ցանկացած նախաձեռնության` «Su-24»-ի օդաչուի ընտանիքին հասցրած վնասի ծանրությունն ու ցավը մեղմելու համար:
Հիշեցնենք, Թուրքիայի նախագահ Ռեջեփ Էրդողանը «CNN» հեռուստաալիքին տված հարցազրույցի ժամանակ հայտարարել էր, որ Թուրքիան չի պատրաստվում ներողություն խնդրել Ռուսաստանից ՍՈՒ 24 կործանիչի խոցման համար: