Խաբված խաղողագործները կրկին կառավարության շենքի մոտ են
13:20, հինգշաբթի, 26 մայիսի, 2016 թ.
Կառավարության շենքի դիմաց այսօր կրկին բողոքի ձայն են բարձրացնում Արարատի մարզի Քաղցրաշեն գյուղի խաղողագործները: Նրանք պահանջում են վարչապետի հետ հանդիպում: Խաղողագործներից Արմեն Մկրտչյանը MAMUL.am-ի թղթակցի հետ զրույցում տեղեկացրեց, որ ո՛չ վարչապետը, ոչ գործարանի տնօրինությունն իրենց խոսքի տերը չեն եղել. «Մեզ այդպես էլ մթերած խաղողի դիմաց չվճարեցին: Ամեն անգամ վճարման օրը հետաձգում են, պետք է երկուշաբթի օրը ամբողջությամբ պարտքերը մարած լինեին, բայց չարեցին»,-տեղեկացրեց մեր զրուցակիցը: Նա հիշեցրեց, որ վարչպետի հետ իրենք համաձայնության էին եկել, որ մինև մայիսի 10-ը պետք է ամբողջությամբ վճարվեր պարտքը, սակայն խոստումը չի կատարվել: «Օրինակ, ինձ իրենք 400 հազար դրամ պարտք են և մինչ օրս մի դրամ անգամ չեն տվել: Եթե օր են նշանակում, թող բարի լինեն էդ օրը տան: Մենք նախօրոք գիտեինք, որ պետք է մեր գումարները ուշ տային, մոտավորապես մարտ ամսին, բայց չպատկերացրեցինք, որ էսքան կձգձգեին»,-ասաց խաղողագործը: Հիշեցնենք, որ ապրիլի 21-ին կառավարության մոտ էին հավաքվել մի քանի տասնյակ քաղցրաշենցիներ, ովքեր պահանջում էին նախորդ տարի մթերած խաղողի դիմաց իրենց գումարները։ «Վինարի» կողմից շահագործվող գինու գործարանը խաղողագործներին ավելի քան 185 միլիոն դրամ է պարտք։ Կառավարության առջև մեկ ժամից ավել ցույց անելուց հետո քաղցրաշենցի մի քանի խաղողագործների հետ հանդիպեց վարչապետ Հովիկ Աբրահամյանը, քննարկմանը մասնակցեց նաև «Վինարի» ընկերության սեփականատեր, ԱԺ պատգամավոր Կարո Կարապետյանն ու գործարանի տնօրենը։ |
2102 | 1