Միջազգային

     Նորվեգիայի Ֆորդե քաղաքում ընթացող ծանրամարտի Եվրոպայի առաջնության շրջանակներում քիչ առաջ ավարտվեց 77 կգ քաշային ծանրորդների պայքարը։ Փառահեղ ելույթ ունեցան Հայաստանի երկու ներկայացուցիչները՝ փորձառու Տիգրան Մարտիրոսյանը և երիտասարդ Անդրանիկ Կարապետյանը։ Մեր ծանրորդները Եվրոպայի առաջնությունը վերածել էին Հայաստանի առաջնության՝ պայքարի մտնելով այն ժամանակ, երբ բոլոր մրցակիցներն արդեն ավարտել էին իրենց մրցելույթները։ Անդրանիկ Կարապետյանը, պոկելով 170 կգ և հրելով 197 կգ , երկամարտի 367 կգ արդյունքով հռչակվեց Եվրոպայի չեմպիոն։ Տիգրան Մարտիրոսյանը, պոկելով 160 կգ և հրելով 192 կգ, երկամարտի 352 կգ արդյունքով հռչակվեց Եվրոպայի փոխչեմպիոն։Լավագույն եռյակը եզրափակեց B ենթախմբում հանդես եկած ռումինացի Դիմիտրու Կապտարին՝ երկամարտի 348 կգ արդյունքով։