Միջազգային իրավունքի ռուսաստանյան ասոցիացիայի անդամ, իրավաբանական գիտությունների թեկնածու Դենիս Դվորնիկովն Ադրբեջանի կողմից արցախյան հակամարտության սրման վերաբերյալ հարցազույց է տվել Regnum գործակալությանը:
«Ռուսաստանյան իշխանություններն արտաքինքաղաքական երկաթբետոնե սկզբունքներ ունեն, ըստ որի ևʹ Հայաստանը, ևʹ Ադրբեջանը ռազմավարական կարևոր դաշնակիցներ են: Հայստանը` քիչ ավելի շատ` ելնելով միջազգային գործող համաձայնագրերից: Բայց պետք է հիշել, որ Ռուսաստանի իշխանություները չեն խզի Բաքվի հետ հարաբերությունները: Այսպիսին են աշխարհաքաղաքական ներկայիս իրադրության կողմից մեզ առաջարկվող այս խիստ հակասական հանելուկի պայմանները: Կարելի է հազար անգամ նայել Ալիևի և Էրդողանի կրքոտ գրկախառնումների տեսանյութը, կարելի է փորձել գոնե մի քանի տարբերություն գտնել Լեռնային Ղարաբաղի Հանրապետության և Ղրիմի Հանրապետության պատմական ծագման միջև»,- հայտարարել է փորձագետը: Նրա խոսքերով` քաղաքական համատեքստում դա ոչ մի իմաստ չունի: «Հայաստանը եղբայրն է, Ադրբեջանն էլ զարմիկը, և վերջ: Բայց այնուամենայնիվ` կարելի է եզրակացնել, որ միջազգային վերաբերմունքի 2 բաժանում կա` մինչ ապրիլի 1 լույս 2-ի արյունոտ գիշեր, և դրանից հետո, երբ ադրբեջանական «գրադներ»-ն սկսեցին ռմբակոծել խաղաղ բնակչությանն ու շփման գծին հարակից դպրոցը»,- ասել է նա:
Իրավաբանը վստահ է, որ Ռուսաստանը հետևյալ կարևոր որոշումները կայացնելու հիմքեր ունի. «Առաջին` Ադրբեջանին զենքի և սպառազինության վաճառքի լիակատար սառեցում: Այդ պետությունը գիտակցաբար խախտել է խաղաղ գործընթացը: Հետևաբար, Բաքվին վաճառված ցանկացած գնդակ կիրառվում է միջազգային իրավունքի նախօրոք ձեռք բերված նորմերի խախտման համար: Ադրբեջանի հետ զենքի վաճառքը ցանկացած պետության ինքնաբերաբար դուրս է բերում գործող միջազգային իրավունքի շրջանակներից ու անուղղելի հարված հասցնում տվյալ պետության հեղինակությանը` զենք վաճառողին խաղաղ բնակչության սպանության գործի անմիջական հանցակիցը դարձնելով: Երկրորդ` Բաքվի վրա ազդելու համար արագ և արդյունավետ քայլեր պետք է ձեռնարկվեն, որոնցով ակնթարթորեն և առանց վնասի հնարավոր կլինի ճնշել ագրեսիայի ցանկացած փորձ. այն է` ադրբեջանական ապրանքների` ներառյալ միրգ բանջարեղենի ներկրման արգելք: Ոչ ոք չի պնդում, թե անհապաղ պատժամիջոցներ պետք է կիրառվեն ընդդեմ Ադրբեջանի, բայց ձեռքի տակ նման լծակի առկայությունն անհրաժեշտություն է: Երրորդ` Ռուսաստանում ադրբեջանցի գործարարների բարեկեցությունը պետք է ուղիղ համեմատական լինի Բաքվի ադեկվատության հետ: Ոչ մեկ ոչ մեկի չի սպառնում, բայց բոլորը հասկանում են, որ տարածաշրջանում խաղաղության պահպանումն անհրաժեշտություն է: Դա միանշանակ նորմալ երևույթ է, որով առաջնորդվում են քաղաքակիրթ երկրների իշխանությունները, որ հարգում են ևʹ իրենց, ևʹ իրենց քաղաքացիներին, ևʹ իրենց գործընկերներին»,- եզրափակել է Դվորնիկովը:
