
''Ժողովուրդ''. 2011 թվականի հոկտեմբերի 28-ին Իջևանի տարածաշրջանի Ներքին Ծաղկավան համայնքում սողանքից քանդվել էր Իջևան-Նոյեմբերյան ավտոճանապարհից գյուղ մտնող 30 գծամետր երկարությամբ ձախակողմյան կողնակը և երթևեկելի մասի գրեթե կեսը: Ճանապարհը դարձել էր միակողմանի երթևեկելի և շատ վտանգավոր: Ներքին Ծաղկավանի գյուղապետ Նաիրի Աթաբեկյանի վկայությամբ` այդ տարածքում սողանքային երևույթները սկսվել են դեռևս 2011 թվականի ապրիլին, իսկ աշնանային անձրևների հետևանքով էլ սողանքն ավելի է ծավալվել: Առկա է հարցի լուծման, ճանապարհի վերականգնման տարբերակ. գումարով փոխհատուցել ճանապարհին հարակից սեփականաշնորհված երկու հողամասերի տերերին, որպեսզի ճանապարհն անցնի այդ տարածքով: Մի քանի օր առաջ երթևեկելի հատվածի ասֆալտի շերտում 1 սմ լայնությամբ, 2 մետր երկարությամբ ճեղք է առաջացել, որը գնալով տարածվում է: Սողանքի վայրում եղել է մարզային փրկարարական վարչության օպերատիվ խումբը, Ներքին Ծաղկավանի գյուղապետ Նաիրի Աթաբեկյանը սողանքի գոտում իրավիճակի վերաբերյալ գրավոր տեղեկացրել է Տավուշի մարզպետ Արմեն Ղուլարյանին: Վտանգավոր ճանապարհը շարունակում է դամոկլյան սրի նման կախված մնալ այդ հատվածով երթևեկողների համար, գյուղը մայրուղուն կապող ճանապարհն ամեն վայրկյան կարող է փլվել: Թերթը նշում է, որ Ներքին Ծաղկավան համայնքը նախկինում էլ է եղել սողանքային գոտի: Հինգ տարի առաջ պետական բյուջեից դրամական փոխհատուցում տրվեց սողանքից տուժած 7 ընտանիքի, ովքեր վերաբնակվեցին: