Միջազգային

«Իսլամական պետության» ահաբեկիչները համացանցում հրապարակել են վանդալիզմի ակտ պարունակող տեսանյութ, որում պատկերված է, թե ինչպես են գրոհային ահաբեկիչները ավերում ասորական հնագույն քաղաք Նեմրութը, որ գտնվում է Իրաքի տարածքում: «ԲիԲիՍի»-ն հայտնում է, որ նրանք նախ ավերել են հազարամյա կոթողները շաղափներով, հզոր կտրող գործիքներով ու բուլդոզերներով, այնուհետև պայթեցրել, որ ոչինչ չմնա իրենց կարծիքով՝ կռապաշտության կեղծ սիմվոլներից:

Նշենք, որ Նեմրութը ներկայիս Իրաքի տարածքում գտնվող հնագույն ասորական քաղաք է, որ գտնվել է երբեմնի Մեսոպոտամիայի տարածքում: Այն հիմնվել է Ք. ա. 13-րդ դարում Սալմանասար 1-ինի կողմից: 4 տարի անց, Աշշուր-նացիր-ափալա 2-րդի գահակալման ժամանակ, դարձել է Ասորեստանի մայրաքաղաք: Ք. ա. 612 թվականին ավերվել է միդիացիների և քաղդեացիների կողմից:

ԻՊ գրոհայինները քաղաքը գրավել էին 2015-ի մարտի 5-ին: Բաղդադը դեռ դժվարանում է գնահատել քաղաքի պատմամշակութային արժեքներին հասցված վնասի չափերը, սակայն փաստ է, որ ավելի քան 2000-ամյա արտեֆակտները և առավել հնագույն կոթողներն ամբողջապես փոշիացվել են: