Հայաստանը և Արցախը նորովի կհամագործակցեն սպորտի ոլորտում
ՀՀ սպորտի և երիտասարդության հարցերի նախարար Լևոն Վահրադյանը հունիսի 9-ին հանդիպում է ունեցել ԱՀ նախագահ Բակո Սահակյանի հետ: Հանդիպմանը ներկա են եղել նաև ՀՀ սպորտի և երիտասարդության հարցերի նախարարի տեղակալ Գաբրիել Ղազարյանը, ԱՀ կրթության, գիտության և սպորտի նախարար Նարինե Աղաբալյանը և այլ պաշտոնատար անձինք: Հանդիպման ընթացքում քննարկվել է համապատասխան ոլորտում երկու հայկական պետությունների համագործակցությանը վերաբերող հարցեր: Ողջունելով ներկաներին՝ Նարինե Աղաբալյանն ասել է, որ այսօրվա հանդիպումը մեկնարկ է՝ նաև նոր ծրագրեր իրականացնելու և եղած համագործակցությունն ավելի խորացնելու՝ բոլոր հնարավոր ուղղություններով: Վահրադյանն առանձնազրույց է ունեցել նաև ԱՀ կրթության, գիտության և սպորտի նախարար Նարինե Աղաբալյանի հետ: Քննարկվել են երկու հայկական պետությունների մարզական ֆեդերացիաների համագործակցությանը, սպորտի մասսայականացմանը վերաբերող հարցեր: Նարինե Աղաբալյանն առաջարկել է Հայաստանում կազմակերպվող առաջնությունների մի մասը տեղափոխել Արցախ՝ տեղում մարզական կյանքը ակտիվացնելու նպատակով, ինչպես նաև անցկացնել փորձի փոխանակում մարզիչների վերապատրաստման ծրագրի շրջանակներում: |