«Փաշիկ Ալավերդյանը խաբում է. ես դոպինգ չեմ ներարկել»․ Արման Ղազարյան
 Երիտասարդների Եվրոպայի չեմպիոն, երիտասարդների աշխարհի առաջնության բրոնզե մեդալակիր, մեծահասակների Եվրոպայի առաջնության բրոնզե մեդալակիր 75 կգ քաշային ծանրորդուհի Սոնա Պողոսյանը կասկածվում է հակադոպինգային կանոնները խախտելու համար։ Ծանրամարտի միջազգային ֆեդերացիան հայտարարել է, որ գործը քննության մեջ է։ MAMUL.am-ի թղթակիցը կապ հաստատեց մարզուհու անձնական մարզիչ Արման Ղազարյանի հետ՝ պարզելու հանգամանքները։ Մարզիչը, սակայն, այդպես էլ ոչ մի հստակ պատասխան չտվեց։ -ԶԼՄ-ներում Ձեր և Արտաշես Ներսիսյանի պաշտոնանկության մասին լուրեր են տարածվել։ Դրանք իրավացի՞ են։ -Երևի ճիշտ չէ։ Ես տեղյակ չեմ։ -Նշվում է, որ քննարկում է տեղի ունեցել, որի ընթացքում որոշում է ընդունվել, որ դուք պաշտոնանկ արվեք, քանի որ Սոնա Պողոսյանի մոտ դոպինգ է հայտնաբերվել։ - Հա բայց մենք ի՞նչ մեղավոր ենք։ Մարդն ասում է «ես չեմ արել տենց բան, չեմ օգտագործել, տեղյակ չեմ»։ - Հայաստանի ծանրամարտի ֆեդերացիայի գլխավոր քարտուղար Փաշիկ Ալավերդյանը և կանանց հավաքականի գլխավոր մարզիչ Արտաշես Ներսիսյանը նշեցին, որ նրանք էլ տեղյակ չեն, և դուք նրանց խաբել եք։ - Ես որ չեմ տեսել ի՞նչ ասեմ, շա՞ռ անեմ։ Ի՞նչ իմանամ։ Էն մարդն ասում է՝ ես չեմ արել ոչ մի բան։ - Հնարավո՞ր է, որ պատահաբար նյութը հայտնվի մարզուհու օրգանիզմում։ - Բժիշկն ասում է, որ դա արված բան է, ճիշտ է ասում։ -Այսի՞նքն։ -Այսինքն մենք տենց բան չենք արել հավաքների ժամանակ։ Էտ ինչ-որ առանձին վերցրած նյութ ոնց-որ լինի։ Փաստացի հայտնաբերել են մարդու օրգանիզմի մեջ, բայց մենք տենց բան չենք արել։ Մենք տեղյակ չենք։ - Պարոն Ալավերդյանը նշել է, որ դուք նրան խաբել եք և նման բան տեղի է ունեցել։ - Խաբում է։ Տենց բան չի եղել։ - Նա նշել է, որ վատ եք վարվել իր հետ։ - Նա խաբում է։ Տենց բան չի եղել։ Իմ հետ խոսացել է շատ նորմալ։ - Դուք մարզուհու հետ խոսե՞լ եք։ Նա ինչպե՞ս է մեկնաբանում իրողությունը։ - Հա, իհարկե խոսել եմ։ - Ինչպե՞ս է մեկնաբանել։ - Ասում է «չեմ արել տենց բան»։ -Այլ տարբերակներ կա՞ն նյութի՝ նրա օրգանիզմ ներթափանցելու։ - Իմ կարծիքով՝ ոչ։ Մարդն ասում է՝ ես չեմ օգտագործել։ Ոնց շառ անեմ իրա վրա։ - Պարոն Ներսիսյանը նշել է, որ դուք իրեն խաբել եք և սա հարված է իր թիկունքին։ - Ինչ ամոթ է․․․ Ոնց կարա տենց բան լինի։ - Նա նշել է , որ դուք խաբել ու վիրավորել եք իրեն ձեր արարքով։ - Բայց մենք շատ սիրող ընկերներ ենք։ Խի՞ պիտի տենց բան անեմ։ Խի հիմա՞ր եմ։ Սա հանելուկ է ինձ համար։ Նա դրանից 4 օր հետո նորից դոպինգ-թեստ է հանձնել և մաքուր է եղել։ - Պարոն Ալավերդյանը նշել է, որ դուք պետք է բողոքարկեք։ Ի՞նչ կասեք այդ մասին։ - Դրա համար ծախսեր են պետք։ Դոպինգ-թեստը հանձնել է, դրական է եղել։ Նորից նույն պատասխանն է գալու։ Իմաստ չեմ տեսնում բողոքարկման։ Համ էլ ֆեդերացիան պետք է որոշի։ Ես ո՞վ եմ։ Ես բան չեմ հասկանում հիմա։ - Որպես անձնական մարզիչ՝ կարող եք ասել՝ ենթադրենք հիմա այդ նյութն ընդունելու իմաստը ո՞րն էր՝ հաշվի առնելով, որ առաջիկայում մրցումներ չկան։ - Ո՞վ է ընդունել այդ նյութը։ - Պարոն Ներսիսյանը նշեց, որ անընդհատ հակադոպինգային սեմինարներ է անցկացրել մարզուհիների հետ։ - Հա, ես էլ եմ ներկա եղել այդտեղ։ Միասին ենք եղել։ Ինչ կա միասին ենք արել։ Փաստացի դեպքը եղել է, ես ի՞նչ մեղավոր եմ։ - Միջազգային ֆեդերացիայի հայտարարության մեջ նշված է, որ հանգամանքները պարզվում են և կա բողոքարկման ժամկետ։ Ի վերջո, ո՞վ է բողոքարկելու այդ որոշումը։ - Դե պետք է միասին հավաքվենք որոշենք։ Ֆեդերացիայում։ - Հանդիպման օրը հայտնի՞ է։ - Ոչ։ Չգիտեմ ոչինչ։ - Պարոն Ալավերդյանը նշեց, որ երեք հոգի կարող էին դոպինգը ներարկել՝ պարոն Ներսիսյանը, դուք կամ բժիշկը։ - Տենց բան չի կարա լինի։ Մենք թույլ չենք տա մեզ։ Ես ինձ նման բան թույլ չեմ տա։ - Հնարավո՞ր է, որ պարոն Ներսիսյանը կամ բժիշկը դա արած լինեն։ - Չէ։ Մենք բոլորս դրա դեմ ենք պայքարում։ Չեմ հասկանում ոչինչ, օդի մեջ եմ։ - Պարոն Ալավերդյանը և պարոն Ներսիսյանը նշում են, որ դուք նրանց խաբել եք։ - Նրանք իմ ընկերներն են։ Խոսել ենք։ - Քննարկման ընթացքում ի՞նչ եք որոշել։ - Չգիտեմ։ Ես տեղյակ չեմ։ - Ձեր մարզուհու հետ ի՞նչ եք խոսել։ - Ասել եմ շատ վատ բան է տեղի ունեցել։ Ինչո՞ւ ուշադիր չես եղել։ Լացում է։ Բա լացելու բան է, հո աչքալուսանք չի։ |
