Հարավային Կորեայի Փհենչհան քաղաքում ընթացող ձմեռային օլիմպիական խաղերին Հայաստանը ներկայացնող լեռնադահուկորդ Աշոտ Կարապետյանին Հայաստանի դահուկային սպորտի ֆեդերացիան չի ապահովել դահուկներով և դահուկային կոշիկներով։ Խնդրի մասին բարձրաձայնել է ինքը՝ մարզիկը ԶԼՄ-ներին տված հարցազրույցներում։ Բարձրացված աղմուկից հետո միայն պատկան մարմիններն սկսել են զբաղվել խնդրով։ ՀՀ Սպորտի և երիտասարդության հարցերի նախարար Հրաչյա Ռոստոմյանը հայտարարվել է, որ խնդիրը շուտափույթ լուծում կստանա։ ՀԱՕԿ-ը հանդես է եկել պաշտոնական հայտարարությամբ՝ նշելով․ «Աշոտ Կարապետյանի համար անմիջապես ձեռք են բերվել օլիմպիական չափորոշիչներին համապատասխան նոր դահուկներ: Դրանք արդեն Փհենչհանի ճանապարհին են: Հայաստանի ազգային օլիմպիական կոմիտեն, Փհենչհանից մեր պատվիրակության վերադարձից անմիջապես հետո, կհրավիրի ՀԱՕԿ գործկոմի նիստ, որտեղ մանրամասն կքննարկվեն ու կպարզվեն ստեղծված իրավիճակի պատճառները»։