«Ռուբեն Մաթևոսյանին բնակարան նվիրելու ժամանակ նույնպես ներկայացվել էր մի սրտաճմլիկ պատմություն, թե նա բազմամարդ տանիքի տակ չի կարողանում ստեղծագործել: Սակայն հետագայում մենք կատարեցինք ուսումնասիրություն. այցելեցինք այդ բանկարան, որը նվիրաբերվել էր նրան և մեզ հաջողվեց պարզել, որ նա ընդհանրապես բնակարանի կարիք չունի և իր ստացած բնակարանը նվիրել է իր դստերը: Նույն պատկերն է նաև Ռաիսա Մկրտչյանի պարագայում, ով բնակվում է Երևանի Արաբկիր-Գյուլբենկյան փողոց 39 շենք, բն. 24 հասցեում, որտեղ գրանցված է 4 անձ: Երևանում շատ ընտանիքներ կան, որտեղ չորս հոգով են բնակվում, իսկ նրա՞նց ինչու բնակարան չի տրամադրվում: Թե՞ գտնվել է ամենահեշտ տարբերակը` մեր քաղաքային բյուջեի հաշվին զավակներին բնակարաններով ապահովելու ճանապարհը»,- այսօր քաղաքապետարանում ՀՀ ժողովրդական արտիստ Ռաիսա Մկրտչյանին բնակարան նվիրելու հարցի քննարկման ժամանակ ասաց Երևանի ավագանու «Երկիր ծիրանի» խմբակցության անդամ Մարինա Խաչատրյանը:
Սոնա Աղեկյանն էլ հետաքրքրվեց, թե ինչո՞ւ է բնակարան ստանում ժողովրդական արտիստը, եթե երկրում 1 միլիոն աղքատ մարդ կա:
Մարինա Խաչատրյանը հորդորեց բնակարաններ նվիրել զոհված զինծառայողների ընտանիքներին, որոնք դրա կարիքն իսկապես ունեն:
Այնուամենայնիվ, Երևանի ավագանին Ռաիսա Մկրտչյանին բնակարան նվիրելու հարցն ընդունեց 58 կողմ և 3 դեմ ձայնով: