«Սանասար Գաբրիելյանը դատավարության ընթացքում բազմիցս ասել է, որ բանակի համար նպատակ է ունեցել ձեռք բերել «Իգլա» տեսակի զենիթահրթիռային համալիր՝ իր սեփական միջոցներով, և զենքի համար գումար Բաբայանը չի տրամադրել: Ձեռք բերված զենքը պլանշետով լուսանկարել են և ցույց տվել Սամվել Բաբայանին: Վերջինը ասել է, որ ամբողջական չէ»,- այսօր, «Իգլա»-ի գործով դատական նիստին ասել է Սամվել Բաբայանի պաշտպան Ավետիս Քալաշյանn` ընդգծելով, որ իր պաշտպանյալն այս հարցում եղել է ընդամենը որպես խորհրդատու:
Փաստաբան Քալաշյանը նշեց, որ եթե Գաբրիելյանի ցուցմունքներին նշանակություն տրվեր, ապա Բաբայանի նկատմամբ նման մեղադրանք չէր առաջադրվի: «Ըստ մեղադրանքի` իմ պաշտպանյալ Սամվել Բաբայանը դրդել է Սանասար Գաբրիելյանին զենք ձեռք բերել և դրա համար վճարելու է 50 000 դոլար, ինչը չի հաստատվել: Այսինքն` մեղսագրված արարքի վկայագրված հատկանիշների առկայությունը որևէ փաստական տվյալով հիմնավորված չէ: Նշված մեղադրանքն ամբողջությամբ կառուցված է ենթադրությունների վրա, մեղադրանքում նշված ձևակերպումները չեն բխում գործով ձեռք բերված նյութերից, հաստատված չեն գործով ձեռք բերված հավաստի, փոխկապակցված, բավարար ապացույցներով»,- ասել է Քալաշյանը` միջնորդելով արդարացնել Բաբայանին:
Նշենք, որ Սամվել Բաբայանը պաշտպանական ճառով հանդես կգա մյուս նիստին: Այս պահին պաշտպանական ճառ են ասում մյուս ամբաստանյալների շահերի պաշտպանները:
Հիշեցնենք, որ այսօր Կենտրոն և Նորք Մարաշ վարչական շրջանների ընդհանուր իրավասության դատարանում «Իգլա» տեսակի դյուրակիր զենիթահրթիռային համալիր ձեռք բերելու համար դատապարտված ամբաստանյալների պաշտպանները հանդես են գալիս պաշտպանական ճառով:
Հիշեցնենք` Սամվել Բաբայանին մեղադրանք է առաջադրվել Քրեական օրենսգրքի երկու հոդվածով՝ ռազմամթերքի ապօրինի շրջանառության և փողերի լվացման:
Նշենք, որ նախորդ նիստին` դատախազը Սամվել Բաբայանի համար պահանջել էր 7 տարվա ազատազրկում։
