Միջազգային

Այսօր Մոսկվայում կայացած մամուլի ասուլիսի ընթացքում Ռուսաստանի ծանրամարտի ֆեդերացիայի նախագահ Մաքսիմ Ագապիտովը հայտնել է, որ մի շարք հավաքականների որակազրկման պատճառով Ծանրամարտի միջազգային ֆեդերացիան` IWF-ը, կփոխի միջազգային առաջնությունների անցկացման օրերը: Այս դեպքում Հայաստանի հավաքականը կկարողանա մասնակցել առաջնություններին:

«Եվրոպայի 2018 թվականի առաջնությունը, որը պետք է կայանար հաջորդ տարվա մարտին, կայանալու է աշնանը` մի շարք հավաքականների որակազրկման պատճառով»,- նշել է Ագապիտովն` ավելացնելով, որ որակազրկման ժամկետն ավարտվում է 2018-ի հոկտեմբերին և Եվրոպայի առաջնությունը կկայանա հոկտեմբերի սկզբին, որպեսզի ծանրորդները ժամանակ ունենան` նոյեմբերի 24-ից դեկտեմբերի 3-ը Պերուում կայանալիք աշխարհի առաջնությանը նախապատրաստվելու համար:

Նշենք, որ Եվրոպայի 2018 թվականի առաջնությունը պետք է կայանա մարտի 22-ից 31-ը` Անթալիայում: IWF-ի պաշտոնական կայքում փոփոխությունների մասին տեղեկություններ դեռևս չկան: