Իրադարձություններ

ՀՀ արվեստի վաստակավոր գործիչ, ռեժիսոր, դերասան Երվանդ Մանարյանն այլևս թատրոնով չի զբաղվում, առայժմ իր հիմնած «Ագուլիս» մանկական թատրոնը չի գործում, հետագայում ինչ ճակատագիր կունենա, կորոշի որդին` Քրիստ Մանարյանը:
     «Հիմա ավելի շատ ընթերցանությամբ եմ զբաղվում, մտքովս հազար ու մի բան է անցնում, նոր մտքեր եմ ծրագրում, բայց թե որն իրականություն կդառնա, որը՝ ոչ, չգիտեմ»,- MAMUL.am-ի թղթակցի հետ զրույցում ասում է 93-ամյա Երվանդ Մանարյանը:
     «Ժամանակներն անցնում են, շատ բան է փոխվում, ըստ ժամանակների պետք է կարողանան մեծերը երեխաների մասին հոգան, որ լավ սերունդ դաստիարակվի: Սա է կարևորը»,- նշում է ռեժիսորը:
     Անդրադառնալով վերջին օրերին սահմանային լարված իրավիճակին՝ Մանարյանը նկատում է, որ մեզ համար դա արդեն նորությունլ չէ: «Դա մեր կյանքն է, այնպես չի, որ անակնկալ բան է տեղի ունեցել: Աստված մեր ճակատագիրն այդպես է ստեղծել, մենք էլ համառորեն չենք ուզում այդ վիճակից հեռանալ, մենք հազար տարի է՝ աշխարհի երեսին ենք, էլի կմնանք, բան չկա»: Արվեստագետի խոսքով` այս հարցի վերջնական լուծումն ամեն մարդ տեսնում է իր հաղթանակով. «Մենք մեր հաղթանակն ենք տեսնում, իրենք էլ թող իրենցը տեսնեն, տեսնենք ո՞վ ավելի հեռատես դուրս կգա»: