Ո՞վ է իրականում դժգոհ Կատարից․ Գագիկ Համբարյան
Կտրուկ վատթարացող իրավիճակը Մերձավոր Արևելքում և հատկապես Պարսից ծոցի տարածաշրջանում բավական մեծ իրարանցում է առաջացրել: Հիշեցնեմ, որ այսօր Սաուդյան Արաբիան, ՄԱԷ-ն, Բահրեյնը, Լիբիան, Եգիպտոսը, Եմենը, Մալդիվները հայտարարեցին,որ խզում են դիվանագիտական հարաբերությունններն իրենց վաղեմի բարեկամ Կատարի հետ: Այս ամենի պատճառը մեկ շաբաթ առաջ Կատարի ԱԳՆ-ի հայտարարությունն էր, ըստ որի Կատարի էմիր ալ-Թանին առաջարկել էր կարգավորել հարաբերություններն Իրանի հետ և պաշտպանել էր «Մահմեդական եղբայրներ» ահաբեկչական կազմակերպությանը: Չնայած նրան,որ Կատարի իշխանությունները հետագայում հայտարարեցին, որ այդպիսի հայտարարությամբ հանդես չեն եկել, բայց Էր Ռիադում և մյուս մայրաքաղաքներում չհավատացին Դոհային: Հիշեցնեմ, որ մինչ այս հայտարարությունը մայիսի վերջին Սաուդյան Արաբիայի մայրաքաղաքում տեղի էր ունեցել մահմեդական երկրների ղեկավարների և ԱՄՆ նախագահի մասնակցությամբ գագաթաժողով, որի ժամանակ ընդունվել էր հակաիրանական բանաձև՝ Իրանի դեմ միասնակակ ճակատով գործելու մասին: Կատարի ԱԳՆ-ի հայտարարությունը ուղղակի չէր տեղավորվում այս բանաձևի մեջ և Պարսից ծոցի միապետություններն սկսեցին միասնական պատժել Դոհային: Կատարի հետ դիվանագիտական հարաբերություններ խզած երկրները ալ-Թանիներին մեղադրում են «Ալ-Ղայդա» և «Իսլամական Պետություն» ահաբեկչական կազմակերպություններին պաշտպանելու համար: Զարմանալին նրանում է, որ այդ երկրները հիմա նոր են «բացահայտում», որ Կատարը այդ ահաբեկչական կազմակերպությունների հովանավորն է...Բայց խնդիրը նրանում է, որ Դոհայի հետ համատեղ այդ ահաբեկչական կազմակերպություններին հովանավորել և պաշտպանել է նաև Սաուդյան Արաբիան, Քուվեյթը և ՄԱԷ-ն: Սակայն Իրանի հետ հարաբերությունները կարգավորելու մասին Կատարի արած հայտարարությունից հետո նոր Էր Ռիադում, Էլ Քուվեյթում և Աբու Դաբիում հիշեցին, որ Դոհան պաշտպանում է «ԻՊ»-ին ու նույն Սաուդյան Արաբիայի և ԱՄՆ-ի կողմից 20-րդ դարի 80-ականներին ստեղծված բեն Լադենի «Ալ-Ղայդային»: Արդեն 6 տարի է` նույն «ԻՊ»-ը սարսափելի հանցանքներ է գործում Սիրիայում, Իրաքում, իսկ վերջին շրջանում նաև Աֆղանստանում, Եմենում և Լիբիայում: Ո՞րտեղ էին սաուդացիները, Էմիրությունների կամ Եգիպտոսի ներկայացուցիչները: Ինչո՞ւ չէին բարձրաձայնում այս մասին: Չէին բարձրաձայնում, որովհետև համապատասխան հրահանգ չկար: Այն, ինչ հիմա կատարվում է Կատարի շուրջ՝ դա նախազգուշացում է ալ-Թանիներին Վաշինգտոնից: Առանց ԱՄՆ-ի «դաբրոյի» ոչ մեկը չէր հանդգնի այսպիսի քայլի Կատարի դեմ: Ալ-Թանիները մինչև հիմա համարվել են Վաշինգթոնի շահերի գլխավոր հովանավորները և պաշտպանը տարածաշրջանում: Պարսից ծոցում տեղակայված երկրորդ մեծությամբ ռազմաբազան (Քուվեյթուից հետո) գտնվում է Կատարում՝ «ալ-Ադիդ» ռազմաբազան է: Կատարը Սաուդյան Արաբյաի հետ համատեղ միլիարդավոր դոլլարներ է ծախսում տարածաշրջանում «վերահսկելի քաոս»-ի ամերիկյան քաղաքկանությունն առաջ մղելու համար, որի գլխավոր նպատակն է կազմաքանդել նավթով և գազով հարուստ պետությունները՝ Իրաք, Լիբիա, Սիրիա, որոշները ենթարկել իրեն՝ Քուվեյթ, Կատար, ՄԱԷ, Օման, Սաուդյան Արաբիա՝ նրանց հարստությունը դարձնելով վերահսկելի Վաշինգթոնի կողմից, որը անհրաժեշտության դեպքում օգտագործվելու է ԱՄՆ-ի և նրա դաշնակից Իսրայելի շահերի համար: «Վերահսկելի քաոս» ծրագրի վերջնական նպատակն է Իրանին ծնկի բերելը և նրա հարստությանը տիրանալը: Հենց այդ նպատակով էլ մայիսի 20-ին Էր Ռիադում էին հավաքվել մահմեդական երկրների ղեկավարները և Դոնալդ Թրամփը: Ու հանկարծ այդ հանդիպումից հետո Կատարը հանդգնում է խաղից դուրս գալ: Դա նրան ոչ մեկ չէր ների և հատկապես Վաշինգթոնը, որը նույն Կատարի և Սաուդյան Արաբիայի հետ միասին մեծ ռեսուրներն է ներդրել Սիրիան կազմաքանդելու և Իրանից հեռացնելու համար: Ու հանկարծ, դեռ գործը չավարտած, Կատարը ցանկանում է լքել նավը: |