ԱԺ խորհրդարանական ընտրություններին ընդառաջ շատ ընդդիմադիրներ տարբեր ամբիոններից ահազանգում են, որ քարոզչական պաստառներ են փակցվում այն շենքերի պատերին, որոնք բնակելի են, այնինչ բնակելի շենքերին գովազդային ցուցապաստառներ փակցնելն արգելվում է Ընտրական օրենսգրքով:
Մասնավորապես, «Առաքելություն» կուսակցության ցուցակը գլխավորող Մեսրոպ Առաքելյանը հիշեցնում է, որ «բազմաբնակարան կամ ստորաբաժանված շենքերի վրա քարոզչական պաստառ, քարոզչական տպագիր և այլ նյութեր կարող են տեղադրվել միայն ֆիզիկական անձի սեփականությունը հանդիսացող տարածքում (այդ թվում` պատշգամբներում, պատուհանների վրա և այլն) կամ արտաքին պատերին տեղադրված վճարովի գովազդային վահանակների վրա»:
MAMUL.am-ի թղթակիցը «Ելք» դաշինքի անդամ Գևորգ Գորգիսյանից հետաքրքվեց, թե այս օրերին նմանատիպ ահազանգեր ստացե՞լ են, կամ օրենքին հակասող այլ խախտումներ արձանագրե՞լ են արդյոք:
«Խախտումները հիմնականում Հանրապետականի կողմից են լինում: Նույնիսկ այդ 5 քառ/մ-ը գերազանցող տարածքների համար, որտեղ պետք է պաստառներ փակցվեն, նախօրոք, մինչև փաստաթղթերը ներկայացնելը, պետք էր ամրագրվեր դա` մինչև ամսի 16-ը, ինչը չի կատարվել: Նրանք Կարեն Կարապետյանի նկարն էին արդեն փակցրել, ինչը միանշանակ անթույլատրելի է»,- ասաց Գ. Գորգիսյանը:
ԿԸՀ-ն պետք է վերահսկի այս գործընթացը: Իսկ թե ինչու է այդ կառույցն աչք փակում նմանօրինակ խախտումների վրա, մեր զրուցակիցը խորհուրդ տվեց նրանց հարցնել: «Կարող եմ մի քանի օրինակ բերել, որտեղ փակցնելով այդ նկարները` խախտել են օրենքը. Օրինակ` Չարենց փողոցի վրա` Ոստիկանության շենքի դիմաց, Դավթաշենում` Սասնա ծռեր փողոցի ետնամասում, Հալաբյան փողոցի սկզբնամասում, հանդիպել եմ նման պաստառների: Ինչ վերաբերվում է բախումներին, դարձյալ Հանրապետակնների կողմից են տեղի ունենում, ինչը ևս խախտում է համարվում»,- ասաց մեր զրուցակիցը: